TPDC YAANDIKA HISTORIA, YACHANGIA SHILINGI MILIONI 500 KWA WATOTO WENYE CHANGAMOTO ZA MOYO JKCI

Shirika la Maendeleo ya Petroli Tanzania (TPDC) limeandika historia kupitia TPDC Marathon 2026, baada ya kufanikisha kukusanya na kuchangia jumla ya Shilingi milioni 500 kwa ajili ya kusaidia matibabu ya watoto wenye changamoto za moyo wanaohudumiwa katika Taasisi ya Moyo ya Jakaya Kikwete (JKCI).
Mbio hizo zilizoandaliwa na TPDC zimewashirikisha zaidi ya wananchi 1,000 kutoka katika makundi mbalimbali na zilijumuisha mbio za kilomita 5, 10 na 21. Mbio hizo zililenga kuhamasisha jamii kuhusu umuhimu wa mazoezi na afya, huku zikitumika pia kama jukwaa la kuunganisha nguvu za wananchi na wadau katika kuchangia matibabu ya watoto wenye changamoto za moyo.
Akizungumza katika hafla hiyo, Makamu wa Rais wa Jamhuri ya Muungano wa Tanzania, Mhe. Deogratius Ndejembi, ambaye alikuwa Mgeni Rasmi, amepongeza TPDC kwa kuandaa mbio hizo na wananchi kwa kujitokeza kwa wingi kushiriki katika tukio hilo lenye lengo la kugusa maisha ya watoto wanaohitaji huduma za matibabu. Makamu wa Rais aliongoza hafla hiyo akiwa pamoja na Waziri wa Nishati, Katibu Mkuu wa Wizara ya Nishati anayeshughulikia masuala ya Mafuta na Gesi, Mwenyekiti wa Bodi ya Wakurugenzi ya TPDC, Mkurugenzi Mtendaji wa TPDC, pamoja na viongozi wengine wa Serikali, taasisi na wadau mbalimbali.
Kilele cha TPDC Marathon 2026 kilikuwa ni makabidhiano ya hundi yenye thamani ya Shilingi milioni 500, yaliyofanywa na Makamu wa Rais kwa Kaimu Mkurugenzi wa JKCI, Bw. Robert Mallya, kwa ajili ya kusaidia upatikanaji wa huduma za matibabu kwa watoto wenye changamoto za moyo. Mchango huo unaifanya TPDC Marathon kuwa zaidi ya tukio la michezo, kwa kuwa umegeuza ushiriki wa wananchi katika mbio hizo kuwa mchango wenye tija katika kuimarisha afya na ustawi wa watoto.
Kupitia TPDC Marathon 2026, TPDC imeendelea kutekeleza wajibu wake wa kijamii kwa kushirikiana na Serikali na wadau mbalimbali katika kuunga mkono juhudi za kuboresha maisha ya wananchi. Mafanikio ya mbio hizo, yaliyodhihirishwa na ushiriki wa zaidi ya wananchi 1,000 na mchango wa Shilingi milioni 500 kwa ajili ya watoto wenye changamoto za moyo, yanaweka msingi wa kuendelea kutumia michezo kama nyenzo ya kuhamasisha afya, kujenga mshikamano na kuleta matokeo yenye mguso chanya katika jamii.




